Markaður Fréttablaðsins skýrir frá þessu í dag. Fram kemur að samkvæmt samantekt Markaðarins gætu 44 þúsund fermetrar bæst við á næstu þremur árum.
„Ef við tökum fyrir skrifstofuhúsnæði þá er ljóst að það er mikið framboð að fara að koma inn á markaðinn.“
Er haft eftir Þresti Þórhallssyni, fasteignasala hjá Mikluborg.
Verslunarhúsnæði í miðborginni hefur gefið eftir og víða á Laugaveginum eru tómir verslunargluggar eins og vegfarendur geta séð.
Nýjar höfuðstöðvar Landsbankans eiga stóran hlut að máli hvað varðar aukið framboð. Í nýju höfuðstöðvunum við Austurhöfn fer bankinn í um 10 þúsund fermetrar en við flutninginn losnar bankinn úr 21 þúsund fermetra skrifstofurými. Bankinn hyggst einnig leigja út eða selja frá sér 6.500 fermetra.
Markaðurinn hefur eftir Garðari Hannesi Friðjónssyni, forstjóra Eikar fasteignafélags, að það þurfi að gera skýran greinarmun á skrifstofuhúsnæði í miðborginni og annars staðar. Í heildina sé markaðurinn í góðu standi en eigi undir högg að sækja í miðborginni.
„Þróunin í miðbænum hefur ekki verið góð að vissu leyti. Fólk hefur kvartað yfir framkvæmdum, aðgengi, skorti á bílastæðum og miklum kostnaði við að leggja í miðbænum. Þetta hefur leitt af sér töluverðan flótta úr miðbænum.“
Er haft eftir Garðari sem sagðist þó bjartsýnn á stöðuna til langs tíma litið.
