Lögreglumenn sem þurftu að fara í sóttkví vegna afskipta af einstaklingum sem grunaðir voru um COVID-19 smit fá ekki greitt fyrir sóttkví og fá ekki aukinn frítökurétt vegna vaktafrídaga sem þeir eiga rétt á á meðan á sóttkvínni stendur. Þetta kemur fram í tilkynningu frá BSRB, sem hafa sent öllum lögreglustjórum landsins erindi þar sem þess er krafist að lögreglumenn í sóttkví fái greitt og fái að fresta vaktafríi þar til eftir sóttkví.

„Lögreglumenn eru framlínufólk í öllum skilningi þess orðs. Þeir mæta almennt fyrstir á vettvang og hafa ekki val um það hvort þeir sinni útkalli þegar eftir þjónustu þeirra er leitað. Þeir eru oftar en ekki ómeðvitaðir um það hvað bíður þeirra og eru berskjaldaðir gagnvart utanaðkomandi ógn eins og smitsjúkdómum“, segir meðal annars í erindi BSRB til lögreglustjóranna.

BSRB telur með öllu óásættanlegt að framlínu fólki eins og lögreglumönnum sé ekki bættur sá frítími sem þeir neyðist til að eyða í sóttkví sem þeir fara í sökum starfa sinna. Bandalagið krefst þess að lögreglumenn fái greiddar yfirvinnustundir fyrir þann tíma sem þeir verja í sóttkví utan skilgreindra vakta. Það sé eðlilegt í ljósi þeirrar áhættu sem þeir taka í störfum sínum sem og vegna þess að við sóttkví glatið þeir dýrmætum frítíma.