Þingmaðurinn Jón Þór Ólafsson er að gefa út Þingspilið. Þetta hugarfóstur þingmannsins fer í prentun ef 800 þúsund krónur safnast á Karolina Fund. Verður spilið þá sent heim að dyrum kaupenda fyrir næstu jól.

„Í spilinu þá spilar þú formann flokks á þingi sem keppist við að koma sem flestum þingmönnum í eigin vasa. Þú getur stutt málefni, sett lögbann á hneyksli og stungið svo hina formennina í bakið. – Þingspilið er fyrir fólk sem þolir ekki spillingu, nema það fái að spila með,“ segir í tilkynningu frá Jóni Þór um spilið.

„Þingspilið varð til í hitamóki eina desember nótt fyrir rúmu ári. Stuttu áður hafði höfundur rekist á Gísla í Nexus (spilabúð) sem sagði vinsælustu spilin í dag vera „partýspil“ sem fólk lærir strax, tekur stuttan tíma að spila og séu það skemmtileg að fólk vilji strax spila aftur. Fyrri hugmyndir höfundar um stjórnmálaspil röðuðust svo inn í partýspila ramman í hitamókinu,“ segir ennfremur í kynningartexta um spilið.

Nánar má lesa um spilið og spilareglurnar hér.