UPPFÆRT kl 16:36: Hér neðst má sjá yfirlýsingu frá Umbru þar sem segir að ráðherra hafi ekki haft aðkomu að því að skipt var um ráðherabíl.
Rafmagnsjeppi af gerðinni Mercedes Benz EQC var keyptur í nóvember í fyrra til afnota fyrir Katrínu Jakobsdóttur forsætisráðherra, fyrir 7,5 milljónir, með 25-30% afslætti. Farangursgeymsla bílsins reyndist þó of lítil fyrir Katrínu og er bíllinn nú notaður fyrir Svandísi Svavarsdóttur, heilbrigðisráðherra. Þetta kemur fram í Fréttablaðinu.
UMBRA, sem er þjónustumiðstöð Stjórnarráðsins, barst fjögur tilboð frá umboðunum og ákvað að kaupa Benz jeppann. Katrín hefur hins vegar sést á Audi e-Tron bifreið undanfarið.
Haft er eftir Viktori Jens Vigfússyni, framkvæmdastjóra UMBRA, að Audi bíllinn hafi verið tekinn á leigu þar til yfirstandandi útboði um þrjá rafmagnsknúna ráðherrabíla lýkur síðar í þessum mánuði og á meðan hafi heilbrigðisráðherra afnot af Benz jeppanum.
Segir hann bílaskipti milli ráðuneyta gjarnan eiga sér stað þó svo það sé yfirleitt svo að sömu bílarnir tilheyri tilteknum ráðherrum. Þá staðfesti hann að samkvæmt reynslunni af Benz jeppanum yrðu gerðar kröfur um aukið rými og meiri veghæð í yfirstandandi útboði.
Hér að neðan má sjá mynd af bíl af sömu tegund ásamt farangursrýminu, sem er sagt um 500 lítrar.
Vegna fréttar í Fréttablaðinu vill framkvæmdastjóri Umbru – þjónustumiðstöðvar stjórnarráðsins taka fram að forsætisráðherra hafði ekki aðkomu að þeirri ákvörðun að skipta um ráðherrabíl. Ákvörðunin, sem tekin var af Umbru, hafði ekkert með farangursrými bílsins að gera heldur var hún liður í víðtækari prófunum Umbru á þessum fyrsta alfarið rafknúna ráðherrabíl Stjórnarráðsins. Í kjölfar þeirra prófana var niðurstaðan eftir samráð við ríkislögreglustjóra og ráðherrabílstjóra að endurskoða nokkrar kröfur til ráðherrabifreiða. Meginbreytingin sem snýr að bifreið forsætisráðherra er aukin krafa um veghæð.