„Góður fríverslunarsamningur verður ekki gerður án samráðs við atvinnulífið. Við í utanríkisráðuneytinu höfum lagt sérstaka áherslu á að efla samráð okkar við hagaðila vegna fríverslunarviðræðna við Bretland, enda miklir hagsmunir í húfi,“
sagði Guðlaugur Þór Þórðarsson, utanríkisráðherra í dag eftir samráðsfund með forystufólki úr atvinnulífinu þar sem rætt var um fríverslunarviðræður Íslands, Noregs og Liechtenstein við Bretland. Greint er frá þessu á vef utanríkisráðuneytisins.
Sem kunnugt er mun Bretland hverfa úr EES samningnum þann 31. janúar næstkomandi að öllu óbreyttu og er sagt brýnt að samkomulag náist um nýjan fríverslunarsamning fyrir þann tíma. Samtök atvinnulífsins boðuðu til málstofunnar að ósk Guðlaugs Þórs, samkvæmt tilkynningunni.
Þar segir einnig að utanríkisráðuneytið hafi haft virkt samráð við hagaðila fljótlega í kjölfar þjóðaratkvæðagreiðslu Breta um útgöngu úr ESB í júní 2016.
Samráðið hafi miðast annars vegar að því að greina áhrif útgöngu ESB úr EES samningnum á íslenska hagsmuni og hins vegar að móta samningsmarkmið fyrir yfirstandandi viðræður við Bretland um framtíðarsamband ríkjanna.