Kjörtímabil borgarstjórnar Reykjavíkur er nú hálfnað. Alls 473 fyrirspurnir hafa verið lagðar fram á 78 fundum borgarráðs á yfirstandandi kjörtímabili sem hófst 18. júní 2018, fram til 7. maí 2020. Þetta kemur fram í svari Helgu Bjarkar Laxdal, skrifstofustjóra skrifstofu borgarstjórnar, vegna eftirgrennslan Eyjunnar.
Leitast var svara við heildarfjölda fyrirspurna innan borgarkerfisins alls, með öllum nefndum og ráðum, en í svari borgarinnar eru aðeins taldar upp fyrirspurnir í borgarráði:
„Varðandi fjölda fyrirspurna í öðrum ráðum og nefndum þarf að snúa sér til þeirra fagsviða sem halda utan um mál á þeim vettvangi. Borgarráð er framkvæmda- og fjármálastjórn borgarinnar þannig að gera má ráð fyrir að eftirfarandi tölur gefi samt tiltölulega glögga mynd af umsvifunum,“
segir í svarinu.
Flestar fyrirspurnirnar koma frá Flokki fólksins, eða 185. Næstflestar koma frá Miðflokknum, 153. Þá kemur Sjálfstæðisflokkurinn með 136 fyrirspurnir og Sósíalistaflokkurinn er með fæstar fyrirspurnir, eða 53.
Af flokkum í minnihluta borgarstjórnar á aðeins Sjálfstæðisflokkurinn aðalmenn í borgarráði, eða þrjá talsins. Hinir minnihlutaflokkarnir eiga einn áheyrnarfulltrúa hver í borgarráði, sem hafa þar einnig tillögurétt.
Í október árið 2019 var áætlað að hver fyrirspurn (hvert mál) kostaði að lágmarki 10.500 krónur. Má því áætla að heildarkostnaður fyrirspurna í borgarráði sé nálægt fimm milljónum króna á kjörtímabilinu.
Þá tekur það 54,4 daga að meðaltali að svara einni fyrirspurn, sé miðað við þær fyrirspurnir sem búið er að svara. Meðalsvartími þeirra fyrirspurna sem enn eru í vinnslu er 79,9 dagar.
Enn er 92 fyrirspurnum ósvarað.