Fréttablaðið skýrir frá þessu í dag. Fram kemur að samkvæmt svartsýnustu spá Ferðamálastofu og KPMG sé gert ráð fyrir 69% samdrætti í ferðaþjónustu. Samkvæmt minnisblaði Byggðastofnunar, um áhrif hruns ferðaþjónustunnar á sveitarfélögin, þá mun hrunið hafa mikil áhrif á atvinnustig og atvinnutekjur og þar með útsvarsstofn sveitarfélaganna. 2018 voru atvinnutekjur rúmlega 80% af útsvarsstofninum.
Fréttablaðið hefur eftir Karli Björnssyni, framkvæmdastjóra Sambands íslenskra sveitarfélaga, að ýmsar þær aðgerðir sem ríkisstjórnin hefur kynnt í aðgerðapökkum muni gagnast sveitarfélögunum.
„En við erum áfram í miklum viðræðum við ríkið um útfærslu og forgangsröðun ef það kemur til meiri stuðningur, sem við erum að kalla eftir.“
Sagði hann og nefndi að beinir fjárstyrkir til verst stöddu sveitarfélaganna hafi komið til tals.
Sigurður Ingi Jóhannsson, samgöngu- og sveitarstjórnarráðherra sagði að þetta væri til skoðunar.
„Það er hópur í greiningarvinnu á ástandinu og á að skila þeirri vinnu af sér eftir um það bil tvær vikur.Svo erum við líka með mat Byggðastofnunar, sem sýnir að staðan er grafalvarleg hjá mörgum og það kemur því líka til greina að grípa til sértækra aðgerða þar sem vandinn er mestur.“
