Fréttablaðið skýrir frá þessu. Fram kemur að undirbúningur að LED-væðingu borgarinnar hafi hafist 2017 og sé heildarkostnaðurinn áætlaður um 3,6 milljarðar.
Í kæru SI kemur fram að samtökin telji viðskiptin útboðsskyld og krefjast þau að samningurinn verði lýstur óvirkur og borginni gert skylt að bjóða innkaupin út.
Í verkefninu felst að skipta á út lömpum í ljósastaurum í borginni, sem eru um 30 þúsund, og setja LED-lýsingu í staðinn. Þetta á að skila betri ljósastýringu og minna viðhaldi. Hver lampi á að borg sig upp á sex til sjö árum. Það er ON sem selur borginni rafmagn í staurana.
„Orka náttúrunnar hefur það hlutverk að framleiða og selja rafmagn, það er óásættanlegt að fyrirtæki í eigu sveitarfélaga fái verkefni af þessu tagi og það án útboðs.“
Hefur Fréttablaðið eftir Jóhönnu Klöru Stefánsdóttur, sviðsstjóra mannvirkjasviðs SI, sem sagði málið þríþætt. Í fyrsta lagi telji SI óeðlilegt að borgin bjóði ekki út daglegt viðhald en slíkt tíðkist annarsstaðar, bæði innanlands og utan. Í öðru lagi vilji samtökin að LED-væðingin verði boðin út því það sé verkefni sem atvinnulífið getur vel sinnt. Í þriðja lagi sé óskiljanlegt hvernig hægt sé að færa rök fyrir að verkefnin endi hjá ON án útboðs.
Hluti kærunnar snýr að hvort ON falli undir undanþágu um útboðsreglur sem heimilar hinu opinbera að sinna verkefnum innanhúss. Borgarlögmaður hefur skilað áliti um að þetta eigi við um ON.