„Viðskiptablaðið birtir hér rasískan og Trumpískan óhróður byggðan á hálfsannleik og slúðri. Íhaldið á bágt þessa dagana, svo mikið er víst,“
skrifar Þórhildur Sunna Ævarsdóttir, þingmaður Pírata á Facebook í dag.
Tilefnið er nafnlaus skoðanadálkur Viðskiptablaðsins, Týr, sem birtist í gær og ber nafnið Kínaplágan, en það er nafnið sem Donald Trump Bandaríkjaforseti notaði um kórónuveiruna þangað til að hann ræddi við forseta Kína í síma fyrir helgi, en mörgum þótti það bera vott af fordómum og rasisma hjá Trump. Eftir símtalið breyttist orðræða hans og notaði hann hefðbundnari nafngiftir á veiruna.
Í pistli Viðskiptablaðsins er fjallað um viðbrögð ríkisstjórnar Kína við Covid-19 faraldrinum og nefnt að hann eigi upptök sín af „ógeðslegum“ matarmarkaði í Wuhan:
„Það er sjálfsagt að nefna Rauða Kína í samhengi við faraldurinn; það var ekki tilviljun háð að upphaf hans var þar. Veirusjúkdómurinn, sem talinn er kominn frá leðurblökum, á rætur að rekja til matvælamarkaðar í Wuhan, þar sem ægir saman lifandi dýrum og dauðum, villtum sem öldum, af öllum stærðum og gerðum. Á netinu má finna myndbönd af markaðnum, sannarlega ógeðsleg, en óhætt er að fullyrða að þar hafi engum reglum um hreinlæti, matvælaöryggi eða smithættu verið fylgt. Var hættan af slíkum mörkuðum, sem finna mátti um gervallt Kína, þó fyllilega ljós, en þangað mátti bæði rekja fuglaflensuna 1998 og SARS 2002, en alræðisstjórnin lét markaðina samt eiga sig þar til fyrir mánuði.“
Þá er nefnt að faraldstölur frá kommúnistastjórninni í Kína séu óáreiðanlegar, sem þar að auki hafi reynt að þagga niður faraldurinn og ofsótt þá sem um hann töluðu og leyft þúsundum að ferðast til annarra landa þrátt fyrir vitneskju sína um smithættuna.