Birgir Hrafnsson, gítarleikari og samfélagsrýnir, gagnrýnir Frosta Sigurjónsson, fyrrverandi þingmann Framsóknarflokksins harðlega í innsendri grein í Fréttablaðinu í dag.

Tilefnið er framganga Frosta gagnvart aðgerðum stjórnvalda vegna Covid-19, en Frosti hefur gagnrýnt aðferðafræðina harðlega. Birgir nefnir Frosta ekki á nafn, en ekki fer á milli mála um hvern er skrifað:

„Það vakti eftirtekt þegar fyrrum alþingismaður birti pistil á fésbók sinni, þar sem hann lýsti almennum efasemdum um aðgerðir og ákvarðanir sóttvarnalæknis og annarra íslenskra yfirvalda í tengslum við COVID-19 veiruna. Hann bætti um betur og í viðtali í útvarpsþætti nokkrum hélt hann því fram að „útlendingum frá hættusvæðum hefði verið hleypt óskimuðum inn í landið til þess að koma smiti inn í samfélagið“ og virtist þar með ekki hafa fylgst með fréttaflutningi af skíðaglöðum Íslendingum í Ölpunum. Þá klykkti hann út með hjartnæmu, opnu bréfi til forsætisráðherra, þar sem hann sagði meðal annars: „Þú ert vonandi mjög hugsi, enda hvílir ábyrgðin nú á þínum herðum og ríkisstjórnarinnar. Það er ekki hægt að vísa ábyrgð á sóttvarnalækni, nú þegar öllum má vera ljóst að aðferð hans er röng og getur leitt til stórtjóns.“

Þekkt áróðursbragð

Birgir segir Frosta fara frjálslega með sannleikann:

„Ofangreind atburðarás lýsir þekktu áróðursbragði. Með ósannindi og hálfsannleik að vopni er reynt að sá efasemdafræjum í huga fólks. Þrátt fyrir að margir láti sér fátt um finnast (sem betur fer), liggur óhróðurinn eftir eins og tyggjóklessa, sem erfitt getur reynst að hreinsa upp að fullu, eins og jafnan er um tyggjóklessur. Þannig má segja að bragðið hafi heppnast í þeim fáránleika að í sjónvarpsþætti þurftu yfirvöld að sverja þennan áburð af sér og voru einnig fluttar fréttir af því.“

Miðflokkurinn litlu skárri

Birgir minnist einnig á auglýsingu Miðflokksins um aðra helgi:

„Sjaldan er ein báran stök og þingflokkur stjórnmálaflokks nokkurs birti heilsíðu auglýsingu af svipuðum (eða sama?) meiði í dagblöðum laugardaginn 21. mars. Þrátt fyrir öllu settlegri tón, fer ekki á milli mála að boðskapurinn er sama eðlis og megum við líklega búast við meiru af slíku á næstunni. Á óvissutímum sem þessum ræður úrslitum að allir leggist á eitt. Til viðbótar við dyggðir eins og samheldni, yfirvegun, sannleiksást og náungakærleik, er einnig mikilvægt að „mæla þarft eða þegja.“