Danska innheimtufyrirtækið Lowell Danmark hefur stefnt Önnu Kolbrúnu Árnadóttur, þingmanni Miðflokksins, vegna ógreiddra eftirstöðva húsnæðisláns hennar í Danmörku. Vísir greinir frá.
Málið er sagt eiga sér langa forsögu, vegna eignar sem Anna seldi, en hún gerði samkomulag um eftirstöðvar lánsins sem fól í sér 80% afslátt ef hún gæti staðið við greiðslurnar. Deilan snýst um hvort virða eigi samkomulagið að sögn verjanda Önnu, Eiríks Gunnsteinssonar:
„Í fljótu bragði þá gerir hún sátt um ákveðna fjárhæð árið 2006 sem hún svo greiðir af og hugmyndin var samkvæmt samkomulaginu að hún myndi greiða ákveðna fjárhæð í hverjum mánuði og þegar hún var búin að greiða upp í ákveðna upphæð þá yrði afgangurinn felldur niður.“
Lánveitandi Önnu fór í slitameðferð og var síðan tekinn yfir af danska fjármálaeftirlitinu, sem svo seldi hluta bankans til annars banka, Nordea. Reyndist henni erfitt að greiða af láninu þangað, en krafan var síðar yfirtekin af Lowell Danmark, sem hefur ekki virt samkomulagið sem Anna gerði við upphaflegan lánveitanda.
Úr varð að Anna greiddi af láninu til ársins 2009, og óreglulega til 2014. Þá fór krafan í innheimtu á Íslandi og Anna hafi ekki greitt afborganir síðan þá.
Katrín Ólafsdóttir rekur málið fyrir Lowell Danmark og segir við Vísi að málið hafi verið í góðum farvegi þangað til að Eiríkur, verjandi Önnu, hafi tekið málið að sér. Þá hafi greiðslu skuldarinnar verið hafnað skyndilega og telur hún að Eiríkur hafi „att“ Lowell út í dómsmálið með þeirri afstöðu sinni.
Málið verður tekið fyrir í apríl.