„Góðan dag. Ég veit að það er margt á ykkur lagt en ég verð að upplýsa. Mig hefur lengi grunað að Davíð Oddsson og Kolbrún Bergþórsdóttir noti sama heila. Hef ekki haft beinar sannanir í höndunum fyrr en nú,“
skrifar Sólveig Anna Jónsdóttir, formaður Eflingar í morgun.
Tilefnið eru leiðarar Morgunblaðsins annarsvegar og Fréttablaðsins hinsvegar sem Sólveig birtir á Facebook og skrifar:
„Hér eru leiðarar úr blöðunum frá í morgun og ég segi: Þarf frekar vitnanna við? Það er margt mögulegt í veröldinni en það er ekki fræðilegur möguleiki á því að tvær manneskjur á svona litlu landi með sinn hvor heilann geti skrifað svona jafn-leiðinlegan og jafn-innihaldslausan og jafn-idjótískan texta. Og séu báðar með aðgang að leiðara-plássi? Kommon, heldur þessi eini heili að ég sé fífl?“
Leiðarar blaðanna eru afar ólíkir, þó umfjöllunarefnið tengist Covid-19.
Leiðari Fréttablaðsins lofar þríeykið Ölmu, Víði og Þórólf fyrir framgöngu sína gegn Covid-19 og gagnrýnir hina sjálfskipuðu sóttvarnasérfræðinga sem gagnrýnt hafa aðgerðirnar.
„Þarna á við málshátturinn góði að oft bylur hæst í tómri tunnu,“
segir Kolbrún meðal annars.
Leiðari Morgunblaðsins er tvískiptur. Báðir fjalla um kórónuveiruna, en sá fyrri, sem Sólveig stillir upp, minnir einna helst á bloggfærslu, en þar er farið úr einu í annað, en mesta plássið fær Karl Bretaprins, sem er greinilega í miklum metum hjá leiðarahöfundi.
„Lesið og lærið samstundis um samsæri eina heilans“ segir Sólveig að lokum.