Mikill samdráttur hefur orðið í flugi Icelandair að undanförnu vegna alheimsfaraldurs COVID-19. Félagið hefur þó haft nóg að gera í fraktflutningum til Bandaríkjanna. Gunnar Már Sigurfinnsson, forstjóri Icelandair Cargo, segir að farþegaflugvélar félagsins séu troðnar af vörum þegar þær fara til Bandaríkjanna.

Morgunblaðið skýrir frá þessu.

„Við erum að troða allt að tuttugu tonnum af frakt í Boeing 767 breiðþoturnar, og nýtum þá pláss sem annars væri notað undir farangur fólks, enda er mun færra fólk í vélunum en áður. Þá erum við að ná að setja 10 tonn af frakt í Boeing 757-vélarnar. Þetta er óvenjuleg staða, en þetta er tvöfalt og þrefalt magn í farþegavélum á við það sem gerist og gengur í venjulegu ástandi. Við höfum svo bætt reglulega inn sérstöku fraktflugi til Boston í Bandaríkjunum til að flytja það sem kemst ekki í farþegakerfið.“

Er haft eftir Gunnari.

Aðspurður um hvort til greina komi að fljúga með frakt í farþegaflugvélum án farþega sagði hann að ekkert sé útilokað í dag. Önnur flugfélög séu aðeins byrjuð á þessu. Hann nefndi að Norðmenn leiti nú leiða til að koma eldislaxi sínum á markað en hann sé að mestu lokaður inni í Noregi í dag. Verið sé að skoða möguleikana í þessu.