Fréttablaðið skýrir frá þessu í dag. Haft er eftir Sigmundi Davíð Gunnlaugssyni, formanni Miðflokksins, að hann hafi búist við meiru.
„Opinber útgjöld eru að aukast lítið. Útgjöld ríkisins felast fyrst og fremst í hlutastarfaleiðinni sem var samþykkt fyrir nokkru á Alþingi og að flýta fjárfestingaátaki . Það er því sáralítið nýtt í þessum tillögum sem er miður.“
Er haft eftir honum. Hann sagði einnig að eðli vandans sé þannig að peningarnir muni nýtast betur ef þeir koma tímanlega. Ef þeir koma ekki fyrr en búið er að segja upp fólki fáist minna fyrir þá og skaðinn verði meiri.
Halldóra Mogensen, þingflokksformaður Pírata, tók í svipaðan streng í samtali við Fréttablaðið.
„Nágrannaþjóðir okkar eru að kynna hlutfallslega margfalt stærri og dýrari björgunaraðgerðir. Það vekur upp spurningar hvort nóg sé að gert.“
Sagði Halldóra sem sagðist hafa sérstakar áhyggjur af viðkvæmum hópum í samfélaginu.
„Það þarf að tryggja heimilum sem lenda í greiðsluerfiðleikum jafnmikið svigrúm og fyrirtækjum. Aðgerðir stjórnvalda þurfa að ná utan um alla, ekki einungis þá sem eru á vinnumarkaði.“
Er haft eftir henni.