Ágúst Ólafur Ágústsson, þingmaður Samfylkingarinnar, lagði til á Alþingi í dag að koma ætti á fót rafrænum þjóðfundi fyrir almenning og fyrirtæki, þar sem koma mætti fram hugmyndum til stjórnvalda um lausnir vegna efnahagsástandsins af völdum kórónuveirunnar.
Hann greinir frá þessu á Facebook og segir nauðsynlegt að hugsa út fyrir kassann á tímum sem þessum:
„Lítil og meðalstór fyrirtæki, sem eru hryggjarstykkið í íslensku atvinnulífi með 70% allra starfa samfélagsins, vilja oft gleymast í svona aðgerðarpökkum. Þá getur almenningur svo sannarlega lagt sitt að mörkum í þeirri hugmyndavinnu sem framundan er. Slíkt aðgengi að vinnunni er lýðræðislegt, skynsamlegt og eykur líkurnar á sátt á þeim aðgerðum sem ráðist verður í. Í efnahagslegu neyðarástandi þarf oft að hugsa hratt en einnig er nauðsynlegt að hugsa út fyrir kassann. Við erum öll í þessu saman og mætum því þessu saman.“
Ágúst segir að margt liggi fyrir og erfiðir tímar blasi við svo skömmu eftir hrun:
„Það er skrýtin tilfinning að vera aftur farinn að ræða neyðarlöggjöf á Alþingi en einungis rúm 11 ár eru síðan ég var formaður Viðskiptanefndar Alþingis sem m.a. afgreiddi frá sér gjaldeyrishöft og hin frægu neyðarlög eftir bankahrun. Nú blasa við erfiðir tímar í íslensku atvinnulífi á nýjan leik og er ljóst að margt þarf að gera.“
