Þær Kolbrún Halldórsdóttir, leikstjóri og fyrrverandi þingmaður VG og Kristín Þorsteinsdóttir, fyrrverandi ritstjóri og útgefandi Fréttablaðsins, sóttu báðar um starf útvarpsstjóra á dögunum.
Kristín hefur þegar krafist rökstuðnings fyrir því að Stefán Eiríksson var ráðinn í starfið og hyggst Kolbrún gera það einnig, samkvæmt frétt Stundarinnar.
„Ég mun óska rökstuðnings. Í opinbera kerfinu fær maður venjulega tilkynningu um að ráðið hafi verið í starfið og boðið upp á rökstuðning. En það var ekki gert í þetta sinni, þetta var bara símtal frá Capacent,“
segir Kolbrún.
Kristín komst ekki í 19 manna úrtak, en alls sóttu 41 um starfið. Stundin segist hafa heimildir fyrir því að pistlaskrif Kristínar um RÚV hafi unnið gegn henni, þar sem þeir hafi sumir verið neikvæðir í garð stofnunarinnar.
Þess ber þó að geta að aðrir umsækjendur sem komust lengra í ráðningaferlinu en Kristín höfðu einnig tjáð sig á gagnrýnan hátt um RÚV, en valið var á milli þriggja umsækjenda, Stefáns, Kolbrúnar og Karls Garðarsonar, framkvæmdastjóra Frjálsrar Fjölmiðlunar sem DV og Eyjan heyra undir.
Samkvæmt Kára Jónssyni, formanns stjórnar RÚV, hafði aðeins einn umsækjandi óskað eftir nánari upplýsingum um ráðningaferlið, en Kári gat ekki tjáð sig um einstaka umsækjendur, þar sem hin alræmda nafnleynd hvíli yfir málinu:
„Þetta er í samræmi við lög Ríkisútvarpsins og nafnleyndin heldur alveg þó að þessu sé lokið.“