Svæðisfélög Vinstrihreyfingarinnar græns framboðs á Austurlandi efndu formlega til aukaaðalfunda félaganna þann 21.febrúar síðastliðins. Auk lögbundinna dagskrárliða var meginefni fundanna að taka afstöðu til sameiningar svæðisfélaga VG á Austurlandi, samkvæmt tilkynningu.
Svæðisfélög VG á Austurlandi hafa verið tvískipt – Fjarðabyggð og Djúpavogshreppur annarsvegar og hinsvegar Fljótsdalshérað, Fljótsdalshreppur, Seyðisfjarðarkaupstaður og Borgarfjarðarhreppur.
Niðurstaða aðalfunda beggja félaganna var einróma að stofna eitt svæðisfélag fyrir Austurland. Í framhaldi var haldinn stofnfundur hvar eftirfarandi stjórn var skipuð:
Ingibjörg Þórðardóttir Neskaupstað, Kristján Ketill Stefánsson Fljótsdalshéraði og Svandís Egilsdóttir Seyðisfirði.
Til vara: Arnar Guðmundsson Neskaupstað og Árni Kristinsson Fljótsdalshéraði, stjórn skiptir með sér verkum á fyrsta fundi.
Ingibjörg gat ekki nætt á fundinn.
„Ljóst má vera að hér eru um ákveðin tímamót að ræða í pólitísku starfi á Austurlandi. Í fullri einingu hafa nú Svæðisfélög Vinstrihreyfingarinnar græns framboðs á Austurlandi sýnt metnaðarfullt fordæmi og brotið blað í sögunni með sameiningu á svæðisvísu. Nýtt framboð VG í sameinuðu sveitarfélagi er fyrsta stóra skrefið að frekari eflingu hreyfingarinnar á Austurlandi. Íbúar eru hér með boðnir velkomnir til þátttöku í öflugri hreyfingu með skýra og metnaðarfulla framtíðarsýn fyrir Austurland allt. Áfram Austurland – Svæðisfélag Vinstri hreyfingarinnar græns framboðs á Austurlandi,“
segir í tilkynningunni.
