Loðnumælingar rannsóknarskipsins Árna Friðrikssonar og fimm uppsjávarveiðiskipa, Heimaeyjar VE, Hákons EA, Aðalsteins Jónssonar SU, Barkar NK og Polar Amaroq, kláruðust nokkurn vegin í nótt, samkvæmt tilkynningu frá Hafrannsóknarstofnun.

Samkvæmt henni eru litlar líkur á loðnuveiðum í ár:

„Einungis lítið svæði út af Húnaflóa er óyfirfarið og mun Árni Friðriksson klára það þegar veður leyfir aftur. Endanlegar niðurstöður þessara mælinga liggja því ekki fyrir en vegna þeirra hagsmuna sem eru í húfi telur Hafrannsóknastofnun rétt að upplýsa nú að magn hrygningarloðnu er vel undir síðustu mælingu sem framkvæmd var í byrjun febrúar.  Þessi niðurstaða er með þeim fyrirvara að smá svæði er eftir og þetta er frumúrvinnsla á gögnum en það eru taldar hverfandi líkur á að niðurstaðan breytist verulega hér eftir. Frekari úrvinnsla mun fara fram á næstu dögum þegar Árni lýkur yfirferð sinni og að því loknu verður greint frá endanlegum niðurstöðum.“

Mælingar fyrri hluta febrúarmánaðar bentu til að heildarmagn hrygningarloðnu væri um 250 þúsund tonn, sem var nokkuð undir því marki sem gefur HAFRÓ tilefni samkvæmt aflareglu, til að mæla með veiðikvóta á loðnu. Hinsvegar þótti full ástæða til nýrrar mælingar þar sem um mikla aukningu var að ræða frá því í janúar.

Magnið nú er hinsvegar undir viðmiðum og því ljóst að ekkert verður af veiðum í ár.