Fréttablaðið skýrir frá þessu í dag. Haft er eftir Herði Arnarsyni, forstjóra Landsvirkjunar, að ef ágreiningur komi upp um atriði raforkusamningsins sé skýrt kveðið á um hvernig eigi að leysa úr honum.
„Varðandi raforkuverðið teljum við að samningurinn sé sanngjarn fyrir bæði fyrirtækin. Vissulega er hann ekki ódýr, en hann er sanngjarn.“
Er haft eftir honum. Fréttablaðið segir að sérfræðingar í orkumálum telji að í samningi Landsvirkjunar og Rio Tinto sé kveðið á um móðurfélagsábyrgð þannig að móðurfélag álversins þurfi að ábyrgjast lágmarkskaup á raforku, um 80 prósent, út samningstímann. Samningurinn gildir til 2036. Fram hefur komið að endurskoðunarákvæði sé í samningum og að hægt sé að virkja það 2024.
„Við teljum traustar ábyrgðir fyrir skuldbindingum beggja aðila í samningnum. Það hefur enginn ágreiningur verið um það.“
Er haft eftir Herði sem sagði jafnframt að endurskoðunarákvæði samningsins eigi að tryggja að samningurinn sé sanngjarn fyrir bæði fyrirtækin.