Bjarni Benediktsson, fjármála- og efnahagsráðherra varð fimmtugur þann 26. janúar síðastliðinn. Halda átti veislu honum til heiðurs í dag, en henni varð að fresta um óákveðinn tíma vegna veðurofsans sem ríða á yfir landið í dag. Kjarninn greinir frá.
Samkvæmt bréfi frá skrifstofu Sjálfstæðisflokksins til trúnaðarmanna flokksins sem sent var í gær kemur fram að móttöku vegna afmælis Bjarna sé frestað vegna óveðursins:
„Móttöku, sem halda átti í tilefni 50 ára afmælis formanns flokksins og því að á síðasta ári fagnaði hann 10 árum sem formaður flokksins, hefur því verið frestað um óákveðinn tíma.“
Fær Bjarni því enga afmælisköku í bráð, en hugsanlega hefur iðnaðarráðherra, Þórdís Kolbrún Reykfjörð Gylfadóttir, geymt sneið handa formanni sínum, en hún tók á móti Köku ársins á skrifstofu sinni í atvinnuvegaráðuneytinu í gær.
Ekki er vitað hvort Bjarni tók sjálfur þátt í keppninni um Köku ársins, en Bjarni er sem kunnugt er mikill kökugerðaráhugamaður. Hver veit nema hann spreyti sig meðal atvinnumanna þegar hann hefur tíma til.
Í innihaldslýsingu Köku ársins 2020 er ráðlagður dagsskammtur af rjómasúkkulaði, saltkarmellumús og Nóa tromp. Höfundur kökunnar er Sigurður Alfreð Ingvarsson, bakari hjá bakaríinu Hjá Jóa Fel.
Landssamband bakarameistara efnir árlega til keppni um Köku ársins. Keppnin fer þannig fram að keppendur skila inn tilbúnum kökum sem dómarar meta og velja úr þá sem þykir sameina þá kosti að vera bragðgóð, falleg og líkleg til að falla sem flestum í geð og hlýtur hún titilinn Kaka ársins.
Keppnin var haldin í samstarfi við Nóa Siríus og voru gerðar kröfur um að kakan innihéldi Nóa tromp. Kaka ársins er nú til sölu í bakaríum félagsmanna Landssambands bakarameistara um allt land og verður til sölu það sem eftir er ársins.
Dómarar í keppninni voru Berglind Guðmundsdóttir, eigandi matarbloggsins Gulur, rauður, grænn og salt. Auðjón Guðmundsson, framkvæmdastjóri sölu- og markaðssviðs Nóa Síríus, og Berglind Guðjónsdóttir hjá Samtökum iðnaðarins.