„Borgarstjóri þarf ekki að leita langt að forystuleysinu,“ segir leiðarahöfundur Morgunblaðsins í dag. Þar er fjallað um hvernig Dagur B. Eggertsson borgarstjóri, hafi tekið á Eflingarvandamálinu á dögunum.
Dagur sagði í gær að staðan í kjaraviðræðunum við Eflingu væri erfið og óvænt, en hluti vandans væri forystuleysi, því enginn væri að útskýra hvað fælist í lífskjarasamningunum.
Leiðarahöfundur Morgunblaðsins segir þetta sérstaka kenningu hjá borgarstjóra þar sem mikið hafi verið rætt um lífskjarasamningana og hvað felist í þeim, það ætti ekki að hafa farið framhjá neinum:
„Kenningin um forystuleysið verður ekki síður vandræðaleg þegar til þess er horft að á sama tíma og borgarstjóri lýsir þeirri skoðun stígur fram annar borgarfulltrúi meirihlutans í borgarstjórn, Dóra Björt Guðjónsdóttir pírati, og ræðir samningaviðræðurnar á þeim nótum að störf þyrftu að vera metin að verðleikum, að hún stæði með láglaunafólki og fagnaði „upprisu láglaunastéttarinnar og bætti því við að það væri klókt af Eflingu að beina spjótum að Reykjavíkurborg því að borgin væri líklegasti samningsaðilinn til að hlusta á kröfurnar! Augljóst er að Dagur B. Eggertsson þarf ekki að leita út fyrir eigin skrifstofu til að finna forystuleysið,“
segir leiðarahöfundur en slíkt hrós Morgunblaðsins til Pírata verður að teljast nokkuð fréttnæmt, þó svo greina megi ákveðna kaldhæðni í orðunum.
Leiðarahöfundur segir þó augljóst hvar vandinn liggi:
„Af orðum Dóru Bjartar blasir við að vandann er að finna innan meirihlutans í Reykjavík og allir vita hver er – eða á að vera – forystusauður þess fríða flokks,“
segir leiðarahöfundur og á þar augljóslega við borgarstjóra.
„Núverandi meirihluti í Reykjavík hefur unnið mikið tjón með margvíslegum axarsköftum og einstrengingslegri og jafnvel ofstækisfullri stefnu sinni í ótal málum. Það tjón sem hann kann nú að vera að vinna gagnvart stöðunni á vinnumarkaði og þar með gagnvart atvinnustigi í landinu og velmegun alls almennings er þó líklega mun stærra og gæti haft enn alvarlegri afleiðingar til lengri tíma litið. Vonandi tekur borgarstjóri eigin orð um forystuleysi til sín og útskýrir fyrir öðrum borgarfulltrúum meirihlutans hvaða afleiðingar það muni hafa ef Reykjavíkurborg stendur ekki í lappirnar gagnvart kröfum um að vinnumarkaðurinn verði settur í uppnám í því viðsjárverða efnahagsástandi sem nú er uppi,“
segir í leiðaranum.