Þingmenn Viðreisnar hafa óskað eftir því að forseti Alþingis fari fram á að heilbrigðisráðherra, Svandís Svavarsdóttir, gefi reglulega skýrslugjöf á þingi á meðan á kórónuveirufaraldrinum stendur.
Í bréfi sem var sent til forseta Alþingis segir að nú hafi heilbrigðisráðherra gefið út tíðar reglugerðir sem annað hvort samræmast eða ganga gegn ráðgjöf landlæknaembættisins. Fyrirkomulagið við setningu laganna veki upp áleitnar spurningar um forsendur að baki þeim. Hanna Katrín Friðriksson skrifar undir bréfið.
„Álitamálin snúa meðal annars að því hvort of skammt eða langt sé gengið varðandi einstakar ráðstafanir, hvort þær byggi á heildstæðu mati á áhrifum á lífsviðurværi og andlega heilsu fólks og hvort jafnræðis sé gætt við ákvörðun og beitingu þeirra, segir í bréfi sem sent var á forseta Alþingis.“
Viðreisn bendir á að varpa þurfi ljósi á forsendur sóttvarnaráðstafana og auka gagnsæi í umræðu um þær.
Ákvarðanir hafi verið teknar í skjóli ráðherravalds án aðkomu og umræðu kjörinna fulltrúa á Alþingi.
„Umræða á Alþingi er nauðsynleg til að tryggja breiða sátt um þær reglur sem settar eru til verndar heilsu þjóðarinnar sem og áframhaldandi traust í garð stjórnvalda. Við aðstæður sem þessar er brýnt að Alþingi sé gert fært að sinna eftirlitshlutverki sínu. Það verður best gert með því að reglubundið samtal eigi sér stað á Alþingi með upplýsingagjöf af hálfu heilbrigðisráðherra.“
Því óskar þingflokkur Viðreisnar eftir því að heilbrigðisráðherra verði gert að gefa reglulega skýrslu um aðgerðir á meðan á ástandi kórónuveirunnar vari.
Sérstakur tími þingstarfa ætti svo að vera varið í umræðu um skýrslugjöfina. Til dæmis annan hvern mánudag, frá öðrum mánudegi í nóvember og þar til þörf á sérstökum ráðstöfunum er yfirstaðin.
„Þingmenn Viðreisnar binda vonir við að hæstvirtur forseti Alþingis sé þeim sammála um hversu brýn þörf sé á upplýstri umræðu þingsins um sóttvarnaráðstafanir stjórnvalda og bregðist við erindi þeirra í samræmi við það.“