„Óskandi væri hún væri spurð í næsta viðtali í Ríkisútvarpinu hvernig á því stendur að hatur í stjórnmálum samtímans á sér einkanlega rætur í hennar flokki, Samfylkingunni, líka gyðingahatur ef út í það er farið,“ segir Ólafur Ísleifsson, þingmaður Miðflokksins, í FB-pistli um Ingibjörg Sólrúnu Gísladóttur, fyrrverandi formann Samfylkingarinnar.
Ingibjörg gegnir nú starfi framkvæmdastjóra lýðræðis- og mannréttindaskrifstofu ÖSE. Ólafur deilir frétt um viðtal RÚV við hana, þar sem hún lýsir áhyggjum af uppgangi pólitískra hreyfinga í evrópskum stjórnmálum. Í tilefni af þessu skrifar Ólafur:
Gott var að sjá Ingibjörgu Sólrúnu í víðvarpi ríkisins. Ég hefi alltaf metið hana mikils og finn til samkenndar, um 40 dagar milli okkar í aldri. Óskandi væri hún væri spurð í næsta viðtali í Ríkisútvarpinu hvernig á því stendur að hatur í stjórnmálum samtímans á sér einkanlega rætur í hennar flokki, Samfylkingunni, líka gyðingahatur ef út í það er farið. Fyrirbæri sem kom mér á óvart ætti sér ekki stað en sýnist skipta suma flokksfélaga Ingibjargar Sólrúnar miklu máli. Mínar bestu óskir til hennar og kærar kveðjur.
Hún er vitaskuld sérfræðingur í pópúlískum stjórnmálum og fengur að hennar sjónarmiðum í þeim efnum. Útilokað að flokkur hennar, Samfylkingin, hafi nokkru sinni lotið svo lágt að taka tillit til almenningsálits. Hitt er annað að almenningur á Íslandi þekkir á eigin skinni hvernig það er að eiga lífsafkomu og heimili undir Samfylkingunni. Nei takk sögðu tugþúsundir Íslendinga og flokkurinn mun vísast seint ná sér eftir að hafa sýnt fólki fram á hvaða hald reyndist í honum þegar kom að heimilum og fjölskyldum landsmanna, börnum, feðrum og mæðrum.