Matthías Imsland, fjárfestir og fyrrverandi forstjóri Iceland Express, er einn þeirra tólf sem koma til greina sem deildarstjóri útlendingadeildar, sem er ný deild innan Vinnumálastofnunar, en alls 97 sóttu um starfið. Stundin greinir frá og setur í samhengi við að Vinnumálastofnun heyri undir Ásmund Einar Daðason, félagsmálaráðherra.

Auk þess er tekið fram að stjórnarformaður Vinnumálastofnunar, sem skipaður var af Ásmundi Einari án tilnefningar, er Ingvar Mar Jónsson, flugmaður og oddviti Framsóknarflokksins í Reykjavík fyrir síðustu sveitarstjórnarkosningar, en þeir Matthías eru sagðir góðir vinir.

Matthías er fyrrverandi aðstoðarmaður Eyglóar Harðardóttur, þáverandi félags – og húsnæðismálaráðherra Framsóknarflokksins, og Sigmundar Davíðs Gunnlaugssonar, fyrrverandi forsætisráðherra og formanns Framsóknarflokksins. Hann er einnig varaformaður stjórnar Isavia og hefur setið í stjórn þess frá 2014 sem fulltrúi framsóknarflokksins.

Stjórnin sér ekki um ráðningar

Vilmar Pétursson, mannauðsstjóri Vinnumálastofnunar, segir við Stundina að stjórnin hafi ekkert með ráðninguna að gera, hún sé á hans höndum og Unnar Sverrisdóttur, forstjóra Vinnumálastofnunar:

„Við sjáum alfarið um þetta og erum að taka viðtöl við þá sem við boðuðum í viðtal og við erum að klára það í þessari viku, allaveganna fyrstu umferð. Það voru 97 umsækjendur og við tókum 12 í viðtal. Stjórnin hefur aldrei komið að ráðningum per se og er ekki inni í daglegum rekstri heldur sér meira um stefnumótun og áherslur.“

Framsókn sér um sína

Þess má geta að af 70 nefndum, stjórnun og ráðum hjá félagsmálaráðuneytinu, hefur Ásmundur í minnst níu tilfellum skipað formann sem er með tengsl við Framsóknarflokkinn, án tilnefningar. Eygló Harðardóttir skipaði tólf.

Frá árinu 1995 hefur Framsóknarflokkurinn farið með félagsmálaráðuneytið í 17 ár af 24 og hafa þeir átt sex félagsmálaráðherra á þeim tíma.

Sjá nánar: Ásmundur Einar duglegur við að skaffa framsóknarmönnum vinnu með pólitískum skipunum:„Ekkert óeðlilegt við það“