„Það vitlausasta sem þingið getur gert við núverandi aðstæður er að freista þess að auka tekjur ríkisins með þyngri álögum á fyrirtæki og/ eða heimili. Í þeim leik tek ég ekki þátt,“ segir Óli Björn Kárason, þingmaður Sjálfstæðisflokksins, í aðsendri grein í Morgunblaðinu í dag.

Í greininni fer Óli yfir efnahagslegar afleiðingar af kórónuveirufaraldrinum og segir að afleiðingarnar á íslenskt efnahagslíf séu enn alvarlegri en víða annars staðar:

„Afleiðingar Covid á íslenskt efnahagslíf eru í mörgu alvarlegri en hjá öðrum löndum og skiptir þar mestu hve mikilvæg ferðaþjónustan er orðin eftir ótrúlega uppbyggingu á síðustu árum. Augljóst er að verulegur samdráttur verður í útflutningi vöru og þjónustu. Hagstofan býst við yfir 30% samdrætti og þá mest í þjónustuútflutningi ferðaþjónustunnar. En einnig er reiknað með samdrætti í útflutningi sjávarafurða.“

Alþingi kemur saman í þessu mánuði til að afgreiða nýja fjármálastefnu en nýtt þing kemur síðan saman 1. október. Óli Björn kallar eftir því að fjárfestingar til að efla atvinnulíf verði í þessum pakka:

„En að opna fyrir súrefniskrana skatta og gjalda er ekki aðeins skynsamleg leið heldur arðbær fjárfesting til framtíðar fyrir ríkissjóð og almenning. Tekjugrunnur ríkis og sveitarfélaga verður styrkari til lengri tíma og ráðstöfunartekjur launafólks meiri. Þetta er ekki flóknara.“