Fataframleiðandinn 66 gráður norður hefur nýtt sér hlutabótaleið ríkisstjórnarinnar vegna efnahagsáhrifa kórónuveirufaraldursins, líkt og forstjórinn, Helgi Rúnar Óskarsson greindi frá í Fréttablaðinu í apríl. Sagði hann þó að reksturinn stæði traustum fótum og félagið væri ekki skuldsett. Hjá fyrirtækinu starfa um 400 manns í fjórum löndum en það rekur 10 verslanir á Íslandi og eina í Danmörku.
Eignarhald fyrirtækisins má einnig rekja til lágskattasvæðanna Lúxemborgar og Hollands og skattaskjólsins Hong Kong, samkvæmt umfjöllun Stundarinnar.
Móðurfélag 66 gráður norður er Sjóklæðagerðin hf. en það félag er í eigu 66North Holding Lux Sarl. Stundin greinir frá að eignarhaldið á félaginu hafi verið fært til Lúxeborgar árið 2018 þegar Helgi Rúnar og eiginkona hans seldu helming félagsins til bandarísks fjárfestingasjóðs fyrir um 3,7 milljarða króna en að nafn sjóðsins eða eigenda hans hafi aldrei komið fram í fréttum, aðeins að sjóðurinn hefði lánað 66 gráður norður yfir þrjá milljarða króna.
Stundin segir eignarhaldið á félaginu sem heldur um eignarhlut Sjóklæðagerðarinnar, verið fært frá Cayman-eyjum til Hong Kong árið 2014, en Cayman-eyjar eru á svörtum lista Evrópusambandsins yfir ósamvinnuþýð skattaskjól.
Lúxemborg og Holland eru það hinsvegar ekki og hafa löndin aukið gagnsæi á undanförnum árum og eru nú nefnd lágskattasvæði en ekki skattaskjól.
Stundin segir það hinsvegar ómögulegt að sjá í opinberum gögnum hverjir raunverulegir eigendur félagsins í Hong Kong séu, sem óbeint nýtur góðs af hlutabótaleiðinni hér á landi í gegnum Sjóklæðagerðina hf.
Stundin tekur þó sérstaklega fram að ekkert bendi til þess að nein skattsvik hafi verið stunduð, né lög brotin.
Talsmenn ríkisstjórnarinnar, þeirra á meðal Bjarni Benediktsson fjármálaráðherra, hafa sagt að skattaskilyrðin í aðgerðarpökkunum séu fullnægjandi og feli vissulega í sér bann við að fyrirtæki geti verið með eignarhald í skattaskjólum. Það sé skýr vilji ríkisstjórnarinnar að koma í veg fyrir að fyrirtæki með eignarhald í skattaskjóli nýti sér hlutabótaleiðina.
Sá vilji er hinsvegar ekki nægilega fastsettur í aðgerðarpakkana að mati margra. Þeirra á meðal er fyrrverandi ríkisskattstjóri, Indriði Þorláksson.
