Sigurður Ingi Jóhannsson, samgöngu- og sveitarstjórnarráðherra, átti í dag fjarfund með evrópskum samgönguráðherrum til að ræða leiðir hvernig mætti draga úr neikvæðum áhrifum af heimsfaraldri kórónuveiru á samgöngur í Evrópu.

Ráðherra lagði áherslu á það á fundinum að Evrópuríki komi sér saman um að aðlaga tímabundið reglur um endurgreiðslu vegna flugs sem fallið hefur niður að núverandi aðstæðum. Það megi gera með því að framlengja endurgreiðslutímabil eða leyfa flugfélögum að gefa út inneignir.

„Þegar Covid lýkur mun fólk leitast við að ferðast til öruggra staða og er Ísland eitt af þeim ríkjum sem hefur brugðist fljótt við sóttvarnarlega og efnahagslega. Samræmdar aðgerðir ríkja við að aflétta takmarkanir í alþjóðaflugi munu hjálpa til í viðspyrnunni og hraða okkur út úr kreppunni,“

segir Sigurður Ingi.

Á fundinum sagði Sigurður Ingi að það væri afskaplega þýðingarmikið að Evrópuríki samræmdu aðgerðir við að aflétta takmörkunum í alþjóðaflugi með markvissum en öruggum hætti.

Ráðherra greindi frá djúpstæðum áhrifum faraldursins á flug og ferðaþjónustu á Íslandi sem staðið hafi undir drjúgum hluta landsframleiðslunnar. Hann upplýsti að farþegaflug lægi nánast alveg niðri og að fjöldauppsagnir standi fyrir dyrum hjá flestum ferðaþjónustufyrirtækjum. Aðeins 5% af hefðbundinni flugstarfsemi stæði eftir sem einkum felist í vöruflutningum.

Sigurður Ingi sagði kollegum sínum að stjórnvöld gerðu tæplega ráð fyrir að atvinnugreinin nái aftur flugi fyrr en árið 2021.