Bjarni Benediktsson, fjármálaráðherra og formaður Sjálfstæðisflokksins, lagði til á fjarfundi leiðtoga íhaldsflokka Norðurlanda og Eystrasaltsríkja um tilslakanir vegna Covid-19 í dag, að ríkisborgarar þeirra landa sem náð hefðu sannanlegum tökum á kórónuveirufaraldrinum, myndu skoða frjálsari för ríkisborgara sín á milli. Vel var tekið í tillögu Bjarna á fundinum, samkvæmt tilkynningu á vef Sjálfstæðisflokksins.

Ef að verður gætu því flugferðir hafist fljótlega milli landa sem hafa náð góðum árangri í baráttunni gegn Covid-19, en Ísland tilheyrir þeim flokki.

Hins vegar var nefnt á fundinum að þau ríki sem einnig ættu aðild að ESB þyrftu að fjalla um málið á þeim vettvangi, en ekki fylgir sögunni hve langan tíma slíkt gæti tekið. Tímaramminn er því óljós um hvenær slíkar ferðir gætu hafist.

„Stjórnvöld á Norðurlöndunum og í Eystrasaltsríkjunum hafa lagt drög að tilslökunum á sóttvarnaraðgerðum á næstu vikum, en ekki er um samræmdar aðgerðir að ræða, enda misjafnt til hversu víðtækra takmarkana hefur verið gripið í hverju landi fyrir sig.

Erna Solberg forsætisráðherra Noregs og formaður Hægriflokksins stýrði fjarfundinum.  Auk Bjarna og Ernu sátu fundinn Ulf Kristersson formaður Moderaterna og leiðtogi stjórnarandstöðunnar í Svíþjóð, Søren Pape formaður danska Íhaldsflokksins, Petteri Orpo formaður Samstöðuflokks Finnlands (Kokoomus), Helir-Valdor Seeder formaður eistneska flokksins Isamaa og Edgars Ikstens frá lettneska flokknum Vienotība.“