„Þessi ,,frétt“ á vísi.is er röng. Og Vísir hefur allar nauðsynlegar upplýsingarnar til að fara rétt með,“ segir Bjarni Benediktsson, fjármálaráðherra, á Facebook síðu sinni, um frétt Vísis af afturvirkum launahækkunum sem birtist í morgun.
Þar kom fram að í sumar fengu ráðherrar, ráðuneytisstjórar og þingmenn afturvirka launahækkun frá 1. janúar 2020, í sumar. Þetta segir Bjarni ekki rétt:
„Launahækkun sem átti að eiga sér stað 1.júlí í fyrra var með lögum færð til 1. janúar 2020. Þannig standa lögin þrátt fyrir að fyrir mistök í Fjársýslu ríkisins hafi sú hækkun ekki verið greidd út. Launin hækkuðu 1. jan 2020 í fyrsta skipti frá október 2016. Það er því rangt að hækkun taki gildi í sumar með afturvirkum hætti.
Við tókum svo ákvörðun á Alþingi með lagabreytingu um daginn að láta hækkunina, sem átti næst að verða 1. júlí, frestast til áramóta. Alþingi er ekki að ákveða neinar nýjar launahækkanir. Alþingi hefur hins vegar frestað tveimur síðustu launahækkunum. Það tel ég vera ábyrgt. Launin eru lögákveðin miðað við launaþróun næsta árs á undan. Það er fyrirkomulagið sem tók við eftir að við lögðum niður Kjararáð sem tók við eftir að við lögðum niður Kjaradóm.“
Þá hefur fjármálaráðuneytið birt tilkynningu vegna málsins sem lesa má hér.