„Einn er sá rekstur sem enga athygli hefur fengið þegar kemur að stuðningi stjórnvalda en getur lítið stuðst við þær leiðir sem þegar hafa verið samþykktar,“
segir Helga Vala Helgadóttir, þingmaður Samfylkingarinnar í grein í Morgunblaðinu í dag, hvar hún kallar eftir sértækum aðgerðum yfirvalda til að styrkja rekstur fjölmiðla:
„Auglýsingatekjur fjölmiðla hafa hríðfallið eftir komu Covid og samkomubanns í kjölfarið. Fjölmiðlar geta ekki nýtt sér þær leiðir sem stjórnvöld hafa boðið upp á því það er jú ekki hægt að fresta bara greiðslum eða senda starfsfólk í hlutastarf. Í lýðræðisþjóðfélagi gegna fjölmiðlar algjöru lykilhlutverki og vil ég því skora á ríkisstjórnina að huga vel að útfærslu á því með hvaða hætti eigi að veita þeim stuðning í næsta pakka sem kynntur verður. Það er ekki hægt að taka ákvörðun um styrkveitingar til fjölmiðla í sumar eða haust því slíkt verður að gerast núna. Það hafa nágrannalönd okkar gert og ég skora á ríkisstjórn að bregðast við áður en tjón verður.“
Ekkert samkomulag hefur enn náðst um fjölmiðlafrumvarp Lilju Alfreðsdóttur sem lagt var fram í desember. Þar býðst einkareknum fjölmiðlum endurgreiðsla upp að 18% af rekstrarkostnaði, sem og heimild fyrir stuðningi upp á fjögur prósent af launakostnaði, gegn ákveðnum skilyrðum.
Helga Vala tekur þar með undir áskorun Sigrúnar Stefánsdóttur, fjölmiðlafræðings, sem skoraði á dögunum á yfirvöld að fylgja fordæmi Dana, og útbúa björgunarpakka fyrir fjölmiðla hér á landi.
