„Ég ætla að gera ráð fyrir að Evrópusambandið standi við skuldbindingar sínar gagnvart EFTA-ríkjunum og banni ekki sölu á þessum útbúnaði til okkar,“

segir Guðlaugur Þór Þórðarson, utanríkisráðherra, við RÚV, vegna ákvörðunar Evrópusambandsins um að banna birgjum í ESB löndunum að selja andlitsgrímur og hlífðarbúnað til annarra landa sem ekki eru í ESB. Ísland er meðal þeirra landa en mikil eftirspurn er eftir þessum vörum vegna Covid-19 faraldursins.

Morgunblaðið greindi frá því í dag að Dynjandi, sem selur slíkar vörur hér á landi, hafi fengið þessi skilaboð frá birgjum sínum.

Guðlaugur segist þegar hafa mótmælt þessu:

„Við höfum í gær og í dag komið þeim sjónarmiðum kirfilega á framfæri við ráðamenn ESB. Við eigum jafnframt náið og gott samstarf við stjórnvöld í Noregi og annarra EFTA-ríkja um að koma þessu máli í réttan farveg sem allra fyrst. Það er með öllu ólíðandi að íslenskir innflytjendur fái þau svör hjá sínum birgjum að bannað sé að flytja vörurnar sem um ræðir til Íslands. Bannið gengur gegn öllu því sem EES-samningurinn byggir á og við gerum ráð fyrir því að úr þessu leysist mjög fljótt,“

segir Guðlaugur Þór.