Guðmundur Gunnarsson, sem hætti sem bæjarstjóri Ísafjarðarbæjar í lok janúar, var í ítarlegu viðtali við Mannlíf í dag þar sem hann útskýrir brotthvarf sitt úr bæjarstjórastólnum. Sagðist hann ekki hafa viljað vera strengjabrúða, heldur stjórnandi og gat ekki sætt sig við skilyrði sem honum voru sett eftir átakafund.

Bæjarfulltrúi Sjálfstæðisflokksins og fyrrverandi formaður bæjarráðs, Hafdís Gunnarsdóttir, segir við héraðsmiðilinn bb.is að með viðtalinu hafi  Guðmundur brotið gegn heiðursmannasamkomulagi sem hann sjálfur hafi stungið upp á við starfslok sín.

„Var það gert munnlega. Nú hefur hann margoft vanefnt það samkomulag með ítrekuðum viðtölum í fjölmiðlum. Ljóst er að umræðan hans er farin að bitna á okkar litla samfélagi og getum við því ekki setið hjá lengur“

segir Hafdís sem boðar viðbrögð frá meirihlutanum á næstunni.

Sjá nánar: Guðmundur ljóstrar upp um starfslokin:„Var verið að leita að strengjabrúðu“