Styrmir Gunnarsson, fyrrverandi ritstjóri Morgunblaðsins, segir það segja einhverja sögu um hugarástand fólks að 87,6 prósent félaga í BSRB hafi samþykkt verkfall sem nær til 15.400 félagsmanna. Verkfallið byrjar 9. mars hafi samningar ekki tekist.

Styrmir skrifar um málið á heimasíðu sína og bendir á að almannaþjónusta á borð við heilbrigðisþjónustu, skóla, sundlaugar og frístundaheimili muni lamast. Þá muni starfsmenn hjá skattstjórum og sýslumönnum leggja niður störf. Styrmir segir að ef til vill sé ekki mikil ástæða til bjartsýni.

„Slíkt verkfall er mikið alvörumál fyrir samfélagið og erfitt fyrir þá, sem utan við standa að skilja hvernig vera má að slík staða sé komin upp eftir að samningar náðust á almennum vinnumarkaði fyrir ári. Miðað við stöðuna í kjaraviðræðum Eflingar og Reykjavíkurborgar virðist ekki mikil ástæða til bjartsýni um framhaldið.“

Styrmir vill ekki segja til um hverjar pólitískar afleiðingar slíks verkfalls yrðu, en segir augljóst að það myndi reyna mjög á stjórnarsamstarfið. „Nema það sama eigi við um VG og Samfylkinguna, þ.e. að báðir flokkarnir hafi algerlega misst tengslin við rætur sínar.“