Umdeild lög um eftirlaun forseta Íslands, ráðherra, alþingismanna og hæstaréttardómara voru samþykkt á Alþingi árið 2003. Voru þau afnumin árið 2009 og er því enginn starfandi þingmaður eða ráðherra að vinna sér inn réttindi samkvæmt þeim lengur.
Hins vegar hljóta þeir sem höfðu unnið sér réttindin áður en lögin voru afnuminn, enn greiðslur. Þeir eru samtals 233 talsins.
Greiðslurnar námu alls 607,6 milljónum króna í fyrra, til fyrrverandi þingmanna, varaþingmanna, og ráðherra. Það er nánast sama upphæð og árið 2018.
Af þessum 233 eru 40 fyrrverandi ráðherrar. Greiðslurnar til þeirra í fyrra námu 129.3 milljónum.
Kjarninn greinir frá þessu.
Þar kemur einnig fram að enginn fyrrverandi þingmanna greiði ennþá iðgjald til sjóðsins af föstu starfi á vegum hins opinbera. Hins vegar hafi einn fyrrverandi þingmaður nýlega greitt iðgjald til sjóðsins vegna tilfallandi verkefna eða nefndarstarfa.
Davíð Oddsson er meðal þeirra fyrrverandi ráðherra sem njóta ennþá eftirlaunanna frá lögunum umdeildu árið 2003. Meðflutningsmenn þess komu úr öllum flokkum á þingi. Þegar kom að atkvæðagreiðslu voru það þó aðeins þingmenn Sjálfstæðisflokksins og Framsóknarflokksins sem tryggðu frumvarpinu brautargengi, auk eins þingmanns Samfylkingarinnar, Guðmundar Árna Stefánssonar. Aðrir flokkar féllu frá stuðningi sínum.
Davíð sagði á sínum tíma að lögin myndu nýtast stjórnarandstöðunni mest:
„Þeir sem að svo nutu góðs af þessum lögum voru fyrst og fremst formenn stjórnarandstöðuflokkanna sem fengu þegar í stað 50 prósenta hækkun á sín laun en þeir sem nutu eftirlaunanna samkvæmt lögunum voru þeir ráðherrar sem urðu forsætisráðherrar, fyrir utan mig, Geir H. Haarde, Þorsteinn Pálsson, Jóhanna Sigurðardóttir og Halldór heitinn Ásgrímsson.“
Samkvæmt Davíð Oddssyni fær hann 80% af launum forsætisráðherra í eftirlaun. Það gera um 1.6 milljónir króna.
Heildarlaun Davíðs árið 2018 voru 5.3 milljónir á mánuði.
