Klukkan átta hófst starfsmannafundur hjá ISAL, álverinu í Straumsvík sem Rannveig Rist forstjóri boðaði til. Þar á að fara yfir stöðu mála hjá fyrirtækinu vegna rekstrarvanda fyrirtækisins, en hann hefur verið viðvarandi í mörg ár sökum minnkandi heimsmarkaðsverðs á áli sem og hækkandi orkukostnaðar á Íslandi. Fréttablaðið greinir frá.
Eigendur ISAL, Rio Tinto, skoða nú alla möguleika til að gera álverið arðbært og samkeppnishæft og meðal þeirra er að loka verksmiðjunni alfarið, eða minnka framleiðsluna enn frekar, en hún var nýlega minnkuð niður í 85%. Frá þessu er greint í tilkynningu frá ISAL.
Endurskoðunarferlið á rekstri fyrirtækisins á að liggja fyrir á fyrri helmingi þessa árs, en hjá ISAL starfa um 500 manns.
Viðskiptamogginn greinir frá því að forsvarsmenn Rio Tinto, eiganda álverksmiðjunnar í Straumsvík, hafi átt fund með Bjarna Benediktssyni fjármálaráðherra með endurskoðun á raforkusamningi í huga, sem gerður var árið 2010. Er hann talinn þrengja svo að starfseminni að fyrirtækið sé komið á ystu nöf.
