Ef Wuhan/Kórónaveiran nær hingað til lands mun það valda miklum vanda og álagi á innviði Landspítalans, að sögn Ólafs Guðlaugssonar, yfirlæknis sýkingavarnadeildar Landspítalans, í Læknablaðinu í dag.

Hann segir þó einnig að spítalinn sé undir það búinn að takast á við veiruna, en vonar innilega að tilfellin verði fá.

Yfir 28 þúsund manns eru smitaðir af Wuhan/Kórónaveirunni í Kína þegar þetta er ritað. Um 565 manns hafa látist. Dánartíðni vírussins út frá þeim tölum er því tæplega 2 prósent. Til samanburðar er dánartíðni Ebóla vírussins sagður um 90%.

Vandi Landspítalans hefur verið áberandi í fréttum undanfarna mánuði og ár. Gjarnan er nefnt að lítið megi bregða út af svo allt fari í handaskol á bráðamóttökunni, þar sem ástandið sé löngu orðið óásættanlegt vegna álags.

Hefur verið sagt að bráðamóttakan megi varla við miðlungsstóru rútuslysi, slíkt sé álagið nú þegar.

Hvað ef…?

Ekki er vitað um nein smit Wuhan/Kórónaveirunar hér á landi enn sem komið er. Ólafur segir að allt sem valdi auknu álagi á Landspítalann sé vandamál:

„Allt sem eykur álagið, slys eða veirusýkingar, valda spítalanum ákveðnum vanda,“

segir hann og leggur mikla áherslu á hversu heitt hann voni að tilfellin verði fá:

„Verði tilfellin mörg kemur það til með að reyna enn frekar á innviði stofnunarinnar og heilbrigðiskerfisins alls. Við vonum að tilfellin verði fá og að kórónaveiran verði ekki íþyngjandi fyrir íslensku þjóðina. Vona það innilega,“

Segir Ólafur og nefnir að allt umfram dagleg verkefni sé afar krefjandi fyrir spítalann:

„Við komum alltaf til með að gera allt eins vel og við getum. Þannig að ég vona að þetta verði viðráðanlegt ástand,“

segir Ólafur.

Eru tilbúnir

Viðbragðsáætlanir hér á landi eru byggðar á uppfærðum áætlunum sem komu til árið 2002 þegar HABL/SARS faraldurinn herjaði á heimsbyggðina. Embætti landlæknis vinnur að því að gefa út leiðbeiningar til heilbrigðisstarfsmanna sem og almennings um hvernig eigi að bregðast við og við hvaða heilbrigðisstofnanir það eigi að hafa samband við, vakni grunur um sýkingu.

Samkvæmt Ólafi verður reynt að stýra sem flestum frá því að leita til Landspítalans og bráðamóttökunnar, og vísa þeim í staðinn til heilsugæslustöðva.

Hann segir Landspítalann hins vegar undirbúinn ef vísa þurfi veikum sjúklingum þangað frá heilsugæslunni:

„Ekki má gleyma að þetta er sjötti faraldurinn sem við lendum í, með svipuðum vandamálum. Við höfum lært af hverjum og einum og sú þekking nýtist við þessum vanda.“