Áætlaðar verklegar framkvæmdir opinberra aðila eru 132 milljarðar króna. Þetta kemur fram á útboðsþingi Samtaka iðnaðarins sem fram fer á Grand Hótel Reykjavík í dag. Þar munu fulltrúar 10 opinberra aðila kynna áætlaðar verklegar framkvæmdir á árinu.

Um er að ræða samtals 132 milljarða króna framkvæmdir sem er 4 milljörðum króna hærri upphæð en kynnt var á Útboðsþingi síðasta árs þegar upphæðin nam 128 milljörðum króna.

Vegagerðin með mest

Vegagerðin er með hæstar áætlar framkvæmdir að upphæð tæpar 39 milljarða króna sem er tæplega 17 milljörðum króna meira en kynnt var á síðasta ári.

Isavia gerir ráð fyrir framkvæmdum fyrir 21 milljarð króna og Reykjavíkurborg fyrir tæplega 20 milljarða króna.

Í fyrsta sinn á þessu þingi eru sérstaklega kynntar verklegar framkvæmdir vegna Landspítala sem eru áætlaðar tæplega 12 milljarðar króna. Þá fyrirhugar Landsnet að bæta við framkvæmdir frá síðasta ári sem nemur 2,5 milljörðum króna.

Áætlaðar verklegar framkvæmdir opinberra aðila