Vinkona mín lenti í því að veikjast í nótt, fór á Bráðadeildina og beið þar sárþjáð í langan tíma. Allir kunna svona skelfingarsögur af Bráðadeildinni – hafa upplifað þetta sjálfir eða hafa heyrt um reynslu ættingja eða vina. Þarna hefur verið ófremdarástand ár eftir ár. Biðtíminn getur verið óhugnanlega langur. Umræðan um þetta gýs upp aftur og aftur, en ekkert virðist breytast. Það eru ekki gerðar neinar úrbætur – nú les maður að yfirlæknir segir að Bráðadeildin bjóði beinlínis hættu heim. Hún ráði ekki við verkefni sín, starfsfólkið kvíði vetrarmánuðunum, ef verði til dæmis stórt slys gæti myndast algjört ófremdarástand. Það myndi þá bætast ofan í flensur vetrarins.

Hvers vegna þetta úrræðaleysi? Hví er ekki hægt að laga þetta? Allir hljóta að skilja að þetta er algjörlega til skammar – og stórhættulegt. Líf og heilsa sjúklinga eru í veði.

Þetta getur ekki verið svo flókið. Jú, það þarf meira fjármagn. Fleiri starfsmenn – meira pláss. Ef ekki er hægt að stækka Bráðadeildina við Borgarspítalann þarf að opna aðra slíka deild, sem tæki þá kannski á öðruvísi vandamálum.

Ef yfirvöld heilbrigðismála fara ekki að bæta úr þessu, og það strax núna í vetur, þá getur maður ekki dregið aðra ályktun en að þarna ríki meiriháttar sinnuleysi.