Bjarni Benediktsson, fjármálaráðherra og Helga Vala Helgadóttir, þingmaður Samfylkingarinnar, tókust á í fyrirspurnartíma Alþingis í dag um hver bæri ábyrgð á því mikla álagi sem nú hvílir á bráðamóttöku Landspítalans, hvers starfsmenn hafa kvartað opinberlega yfir.
Helga Vala vildi meina að Bjarni bæri ábyrgð þar sem hann „héldi um veskið“ og spurði hvað ríkisstjórnin ætlaði sér að gera í málinu.
Bjarni taldi þetta ódýrt skot hjá Helgu Völu og furðaði sig á að fjármálaráðuneytið væri gert ábyrgt fyrir stöðunni á rekstri opinberra stofnana, þar sem stjórnendur þeirra væru í samskiptum við sitt fagráðuneyti og í þessu tilfelli væri það ekki fjármálaráðuneytið:
„Við ætlumst til þess að stjórnendur og fagráðuneyti taki á alvarlegum málum á borð við það sem hér er rætt, en menn fari ekki í einhverja pólitíska leiki í þingsal og vísi ábyrgð í fjármálaráðuneyti þegar svo þykir henta,“
sagði Bjarni, en bar því við að auðvitað hlustuðu stjórnvöld á það sem heilbrigðisstarfsfólk hefði að segja um stöðuna.
Helga sagði peningavaldið hjá Bjarna og stjórnvöldum og því bæri hans ráðuneyti ábyrgð, ekki þýddi að svara þannig að ábyrgðin væri ekki þeirra.
Bjarni hinsvegar kallaði eftir ábyrgð stjórnenda Landspítalans:
„Það er Alþingi sem er með fjárstjórnarvaldið og hefur ákveðið hvaða fjárveitingar verða veittar til Landspítalans. Að koma hér upp og vísa bara í fjármálaráðuneytið þegar er rekstrarvandi í einstaka stofnunum er ódýr pólitík. Þetta er misheppnuð pólitík og á skjön við allt sem við höfum komið okkur saman um í lögum um hvernig fjárstjórnarvaldið er. Það er hér á Alþingi. Ábyrgð stjórnenda er mikil.“