Ólöf Skaftadóttir, annar ritstjóri Fréttablaðsins, gagnrýndi orðræðu Ragnars Önundarsonar í leiðara Fréttablaðsins í dag, hvar hún sagði meðal annars að Ragnar tilheyrði hópi fólks sem saknaði gamalla tíma og forréttinda sinna, en sífellt minni eftirspurn væri eftir rykföllnum skoðunum slíks hóps, en Ragnar hefur sem kunnugt er tjáð sig um forystu Sjálfstæðisflokksins, ekki síst um útlit hennar, og þá sérstaklega Áslaugar Örnu Sigurbjörnsdóttur, sem hann kallaði „sætan krakka.“
Ragnar tjáir sig um leiðarann á Facebook:
„Ég þakka auðsýndan heiður, ábendingar mínar til unga fólksins, sem ekki getur staðið í lappirnar og varið hagsmuni kjósenda, eru taldar þess virði að ég fái ádrepu í leiðara Fréttablaðsins ! Þeim er greinilega farið að svíða, sem undir sig míga.“
Ragnar bætir við að Ólöf njóti tjáningarfrelsis, eins og hann sjálfur, en hann telur að opinberar persónur verði að þola meiri umræðu en aðrir:
„Það er þeim, eins og öðrum, mikilvægt að fá að vita hvernig aðrir sjá þær. Að vera svo umkringdur já-fólki að maður skynji þetta ekki er ungu, hæfileikaríku fólki hættulegt, því gæti hlekkst á, á framabrautinni. Blaðamenn ættu að meta tjáningarfrelsið mest allra. Þessi leiðari er aumkunarverð tilraun til þöggunar, sem engu máli skiptir. Það er líka ekki til neitt ,,afaveldi”. Lífeyrisþegar eru ekki í neinni stöðu til að ræða megi um þá sem ,,veldi”. Sumir eiga samt enn tjáningarfrelsi og kosningarétt. Unga fólkið sem vill frama strax, jafnvel verða forsætisráðherra, gæti rekið sig á það.“
