Farið hefur verið yfir aðgerðaráætlun Ofbeldisvarnarnefndar Reykjavíkurborgar. Hún er sett fram til að fá yfirsýn yfir þau fjölmörgu verkefni sem borgin sinnir í vinnu gegn ofbeldi. Verkefnum miðar vel áfram, samkvæmt vef Reykjavíkurborgar.
Aðgerðaráætluninni, sem er í 37 liðum, er ætlað að vera „vegvísir í baráttunni gegn ofbeldi og tryggja að þau verkefni sem tilgreind eru verði framkvæmd.“
Ofbeldisvarnarnefnd Reykjavíkurborgar starfar í umboði borgarráðs og er hlutverk hennar að vera ráðgefandi fyrir starfsemi borgarinnar í málaflokknum og stuðla að upplýstri umræðu um ofbeldi á öllum sviðum borgarinnar.
Ofbeldisvarnarnefnd er skipuð 7 fulltrúum og jafnmörgum til vara. Borgarstjórn kýs þrjá fulltrúa og þrjá til vara, Lögreglustjórinn á höfuðborgarsvæðinu tilnefnir einn fulltrúa og einn til vara, Stígamót tilnefna einn fulltrúa og einn til vara, Samtök um kvennaathvarf tilnefna einn fulltrúa og einn til vara og Embætti landlæknis tilnefnir einn fulltrúa og einn til vara.
Meðal atriða í áætluninni er vitundarvakning á birtingarmynd ofbeldis, samvinna með Kvennaathvarfinu og Heilsugæslunni á höfuðborgarsvæðinu, ráðgjöf og stuðningur starfsmanns barnaverndar og félagsráðgjafa í útköllum lögreglu, stuðningur við börn sem verða vitni að heimilisofbeldi, ýmiskonar upplýsingagjöf á heimasíðu Reykjavíkurborgar, samstarf við frjáls félagasamtök, meðferð fyrir gerendur, reglulegir samráðsfundir, þjónustusamningar og margt fleira.
