Breki Karlsson, formaður Neytendasamtakanna, var gestur í Morgunútvarpi Rásar 2 í morgun. Þar greindi hann frá því að smálánafyrirtækin hafi komið því inn í skilmála sína að með samþykki gefi notendur þjónustunnar leyfi fyrir því að smálánafyrirtækin geti innheimt skuld sína beint af bankareikningi viðkomandi skuldara. Það varði hinsvegar við lög.
Breki segir að önnur fjármálafyrirtæki, sem og bankarnir hljóti að bera ábyrgð líka, fyrir að leyfa þessu að gerast:
„Það sem við erum að beina sjónum okkar að núna eru öll þessi fyrirtæki sem telja sig vera ábyrg en leyfa þessu að gerast, því smálánafyrirtæki virðast geta farið beint inn á bankareikninga hjá fólki strax og einhver peningur birtist á reikningnum. Við höfum sent öllum fjármálafyrirtækjum í landinu fyrirspurn um hvernig þetta megi vera,“
segir Breki en nefnir að óheimilt sé að skuldbinda fólk umfram lög:
„Að sögn smálánafyrirtækjanna hefur fólk merkt við þannig að það megi taka út af reikningum þeirra, en það má aldrei skuldbinda sig umfram lög, þú getur ekki skuldbundið fólk umfram það sem leyfilegt er samkvæmt lögum. Smálánafyrirtækin eru því með aðstoð, eða með því að önnur fyrirtæki líti framhjá þessu, að fremja lögbrot á okkar skjólstæðingum.“
Sagðist Breki vera að bíða svars frá bönkunum um hvernig standi á þessu.
Breki nefndi einnig að mörg dæmi væru um að fólk hefði lent í vítahring smálána:
„Við höfum séð dæmi um allt að 35 þúsund prósent vexti. Þetta er náttúrulega úr öllu korti,“
sagði Breki, en samkvæmt lögum má aðeins veita lán með hámarki 50 prósent vöxtum, auk Seðlabankavaxta.
vonast Breki til að fá fjármálastofnanir og bankana til liðs við sig að uppræta slíka starfssemi.
