Örvar Þór Guðmundsson, viðskiptastjóri hjá Prentmet er umsjónarmaður góðgerðafélagsins Samferða, sem í átta ár hefur verið með árlega söfnun til að aðstoða fólk fjárhagslega sem orðið hefur fyrir ýmiskonar áföllum í lífinu.
Sjá einnig: Örvar Þór:„Ein móðirin grét svo mikið af gleði að átta ára dóttir hennar fór að gráta líka“
Hann birtir færslu í dag sem hann segir athyglisverða, en þar birtir hann launakostnað ýmissa félagasamtaka á Íslandi. Tekur hann jafnframt fram að launakostnaðurinn hjá sínu félagi sé enginn, og umsýslukostnaður sé heldur enginn.
Óhætt er að segja að launakostnaðurinn sé nokkuð mikill hjá þeim félögum sem hann nefnir en athuga þarf að umfang, eðli og starfsmannafjöldi þeirra góðgerðarfélaga er misjafn sömuleiðis og óvíst að þau falli öll undir sömu skilgreiningu.
Til dæmis eru tæplega 60 starfsmenn hjá Krabbameinsfélaginu, en 20 hjá Unicef. Tólf starfa hjá ABC barnahjálp og átta starfsmenn í fimm stöðugildum eru hjá SOS barnaþorpum. Miðað er við upplýsingar á heimasíðum.
Örvar segir eflaust flesta lítið hugsa um þann kostnað sem starfsemi góðgerðafélaga útheimti:
„Athyglisvert að skoða tölur hjá hinum og þessum félögum samkvæmt ársreikningum þeirra. Svona eftir að maður byrjaði í þessu góðgerðarbrölti fyrir nokkrum árum. Þar áður hafði maður sjálfsagt líkt og rjóminn af þjóðinni ekkert pælt í þessu.“
Örvar birtir síðan töflu með launakostnaði nokkurra stærstu góðgerðarsamtakanna hér á landi:
Samanlagt er launakostnaður þessara ólíku félagasamtaka því um 640 milljónir króna á ári.
Örvar tekur síðan fram að engin launakostnaður né umsýslukostnaður sé hjá hans samtökum, þó svo tekist hafi að safna veglegri upphæð í ár:
„Samferða góðgerðarsamtök sem ég starfa fyrir: Launakostnaður 0 krónur öll okkar ár. Annar kostnaður reyndar líka 0 krónur öll okkar ár. Árið 2019 styrktum við 93 fjölskyldur hér á landi um samtals 6.266.989 krónur. Staðan á reikningi okkar í dag 2.232.000 krónur.“
