Þetta er auglýsing frá því fyrir nákvæmlega eitt hundrað árum, úr Vísi, dagsetningin er 19. desember 1919. Þetta er frekar einfalt, ekkert verið að blása út letrið eða nota hástafi, stendur bara:
„Góð bók er besta jólagjöfin. Nú er meira bókaval en nokkru sinni fyr í Bókaverslun Sigfúsar Eymundssonar.“
Á jafnvel við nú og þá. Bækur eru hin klassíska íslenska jólagjöf og „bókavalið“ er ef eitthvað er enn betra en var fyrir hundrað árum.
Auglýsingin birtist á forsíðu Vísis eins og má sjá hér að neðan. Það er dálítið skemmtilegt að nefna að bæði Bókaverslun Sigfúsar Eymundssonar og Vísir lifa enn – þó auðvitað ekki í óbreyttri mynd.
Bókabúð Eymundsson tók til starfa í Miðbænum 1872 – nú eru margar verslanir reknar undir heitinu Penninn Eymundsson en upprunninn er semsagt fyrir næstum 150 árum.
Vísir var stofnaður 1910, kom út undir því nafni til 1981 og sameinaðist þá Dagblaðinu og hét upp frá því DV. Það kemur ennþá út, og má því segja að það eigi eldri sögulegar rætur en aðrir íslenskir fjölmiðlar.
Vísir var ætíð Reykjavíkurblað fyrst og fremst, málgagn kaupmanna. Við sjáum á forsíðunni hér að neðan að Jakob Möller er skráður ritstjóri og eigandi. Jakob var einn foringi Frjálslynda flokksins sem rann saman við Íhaldsflokkinn 1929 svo úr varð Sjálfstæðisflokkurinn.
