Svona hefjast staksteinar Morgunblaðsins en í þeim er hjólað rækilega í borgaryfirvöld fyrir að „hlusta ekki á umkvartanir eða ábendingar og takmarka aðgengi að borgarstjóra þannig að almennir borgarbúar eigi þess engan kost að koma sjónarmiðum sínum á framfæri.“
„Um þetta eru því miður fjölmörg dæmi sem ekki verða rakin hér enda mörg hver vel þekkt,“ segir í pistlinum. „Sennilega veit meirihlutinn í borgarstjórn af þessu þó að hann viðurkenni það ekki og ef til vill er það þess vegna sem hann heldur kosningar á hverju ári um eitt og annað smálegt.“
Þá er þáttakan í íbúakosningunum fyrir verkefnið Hverfið mitt tekin fyrir og hún sögð vera með fádæmum léleg. „Borgin birti engu að síður frétt á vef sínum í fyrradag þar sem sagði í fyrirsögn: Besta kosningaþátttakan til þessa.“
Ritstjórn Morgunblaðsins gagnrýnir þetta harðlega. „Þessi besta kosningaþátttaka sögunnar var þegar nánar var gáð rúm 12% og innan skekkjumarka sú sama og árið áður,“ segir ritstjórnin og bendir á að þáttakan sé að vísu skárri en þegar verst lét, þegar kosningaþáttakan fór undir 6%. Þá segir í pistlinum að þessar tölur lýsi engu öðru en því að áhuginn á kosningunum sé nánast enginn.
„Væri ekki nær fyrir borgina að skoða það hvers vegna svo lítill áhugi er á að taka þátt frekar en að hrósa sér af því að þátttaka aukist um eitt prómill eða svo? Vilji borgaryfirvöld veg beins lýðræðis meiri er örugglega ekki rétta leiðin að umgangast það með þessum hætti.“