„Þetta er alveg vonlaus félagsskapur að mínu viti og einhver sá vitlausasti á landinu nú um stundir,“ sagði Brynjar Níelsson í umræðum á Alþingi í dag þar sem tekist var á um samning íslenska ríkisins og þjóðkirkjunnar, samning sem tryggir greiðslur ríkissjóðs til þjóðkirkjunnar næstu 15 árin.
Fjallað er um málið á Stundinni en Brynjar var þarna að tala um lífsskoðunarfélagið Siðmennt. Í umræðunum benti Píratinn Helgi Hrafn Gunnarsson á að önnur trú- og lífsskoðunarfélög veittu sambærilega þjónustu og þjóðkirkjan og gagnrýndi upphæð og forsendur samningsins.
Brynjar segist styðja þjóðkirkjuna og vill vernda hana. Hann hvatti einnig til biblíulesturs og sagði:
„Svo eiga menn líka bara að lesa biblíuna þó þeir hafi enga trúarsannfæringu. Þó ekki nema til þess að læra íslensku! Það lærir enginn íslensku sem les ekki biblíuna, háttvirtur þingmaður.“