Matvöruverslanir eru nú troðfullar af örvæntingafullu fólki sem vill hafa vaðið fyrir neðan sig í óveðrinu sem spáð er í dag.

Hefur DV fengið ábendingar um að varla fáist lengur bílastæði við verslanir Hagkaupa, Bónus og Krónunnar í Skeifunni.

Miðað við umfang og magn þess sem fólk kaupir er engu líkara en að fram undan sé margra vikna útgöngubann og mikið sé tekið af dósamat.

Þá eru Vínbúðir flestar hverjar yfirfullar einnig og greinilegt að margir hugsa sér gott til glóðarinnar.

Þess má geta að flestar verslanir hafa tilkynnt um styttan opnunartíma í dag vegna veðurins.

Um þetta er einnig talað á samfélagsmiðlum:

HÍ felldi niður próf í dag (aldrei séð svona áður) og jólakötturinn hlekkjaður niður, líður eins og við séum að bíða eftir einhversskonar heimsendi pic.twitter.com/IsPpt8wDn9

— Kolbrún Birna (@kolla_swag666) December 10, 2019

Hér heima í Miðtúninu bærir sjaldnast hár á höfði sama hvernig viðrar. Nú er hér hinsvegar alvöru alvöru rok.
Ákveðin dómsdagsspenna sem fylgir. Bílnum hefur verið lagt fjarri háu trjánum.
Fleira var það ekki úr Miðtúninu að sinni.
Lifið heil.

— vaselín (@_elinasbjarnar) December 10, 2019

Ágætis heimsendastemmning í Bónus í hádeginu. Allir þöglir og einbeittir að hrúga einhverju kjaftæði í körfurnar sínar, smá örtröð á bílastæðinu. Allt eins og það á að vera.

— Hildur (@hihildur) December 10, 2019

Mig vantaði ost með kvöldmatnum í gær um 19. Allt brauð búið í Krónunni uppá Höfða og allar hillur frekar tæpar. Langaði helst að moka restinni úr búðinni ofan í körfu til öryggis.

— María Einarsdóttir (@majae) December 10, 2019

Ég er í Krónunni úti á Granda. Það eru svona 7-800 manns hérna. Það er proper heimsendafílingur í gangi. Þurrmaturinn að klárast. Það er mikið undir hjá Veðurstofunni.

— Arnar Sveinn (@arnarsveinn) December 10, 2019