Markaður Fréttablaðsins skýrir frá þessu í dag. Haft er eftir Jóhanni M. Ólafssyni framkvæmdastjóra ÍV að búið sé að tryggja grunnfjármögnun Play að uppfylltum ákveðnum fyrirvörum og skilyrðum. Hann vildi ekki segja hver heildarupphæð fjármögnunarinnar er en sagði um blöndu af lánsfé og hlutafé að ræða.
„Play hefur gert samning við Íslensk verðbréf um að halda utan um fjármögnun á félaginu frá innlendum og erlendum aðilum. Íslensk verðbréf tóku þetta verkefni að sér því við teljum þetta mjög vel útfærðan og áhugaverðan fjárfestingarkost og fundum strax fyrir miklum áhuga. Eins og kom fram í kynningunni telja stjórnendur Play mjög mikilvægt að félagið hefji rekstur með sterka lausafjárstöðu. Íslensk verðbréf munu áfram vinna með aðilum að bæta við fjármögnunina svo að félagið hafi enn sterkari lausafjárstöðu frá upphafi“
Er haft eftir Jóhanni.
Markaðurinn segist hafa heimildir fyrir að stærsti hluti fjármögnunarinnar, um 40 milljónir evra, sé í formi lánsfjár með breytirétti í hlutafé frá breskum fjárfestingarsjóði.
Ekki er vonast eftir peningum frá íslensku lífeyrissjóðunum inn í nýja félagið heldur er horft til fjárfestingarsjóða og einkafjárfesta.