Borgarmeirihlutinn hefur kynnt níu mánaða uppgjör Reykjavíkurborgar sem afgreitt var í borgarráði í dag. A-hluti borgarinnar skilar þar jákvæðri afkomu upp á 5,2 milljarða.

Borgarstjórnarflokkur Sjálfstæðisflokksins hefur gert bókun við uppgjörið og gagnrýnir þar mjög aukningu skulda. Benda Sjálfstæðismenn á að skuldbindingar hækki um rúma 2,5 milljarða á mánuði:

„Heildarskuldir og skuldbindingar borgarinnar á síðustu 9 mánuðum fara úr því að vera 324 milljarðar króna í 348 milljarða. Þetta þýðir hækkun upp á 24 milljarða eða ríflega 2,5 milljarðar á mánuði. Á hverja fjögurra manna fjölskyldu í borginni hafa heildarskuldir því hækkað um 750 þúsund krónur á aðeins 9 mánuðum. Það verður vandséð að þessi skuldaþróun sé dæmi um „ábyrga fjármálastjórn“ eins og fulltrúum Viðreisnar er svo tíðrætt um. Vandséð er að þessi útkoma sé í samræmi við yfirlýsingar borgarstjóra um að borgin sé að skila „góðum afgangi“. Þetta sýnir að forsendur samstarfsins eru brostnar þar sem gert var ráð fyrir að skuldir yrðu greiddar niður í Meirihlutasáttmálanum.“