Frá og með 1. janúar næstkomandi mun utanríkisráðuneytið ekki lengur heita utanríkisráðuneytið. Af hverju ? Jú, því það mun heita utanríkis- og þróunarsamvinnuráðuneytið.
„Þetta endurspeglar aukið vægi þróunarsamvinnunnar í utanríkisstefnunni. Um leið verður skipulagi ráðuneytisins breytt með það að markmiði að samþætta þróunarsamvinnuna við aðra starfsemi þess í enn ríkari mæli en nú er,“
segir Sveinn H. Guðmarsson, fjölmiðlafulltrúi utanríkisráðuneytisins við Morgunblaðið í dag, en árið 2015 var starfsemi Þróunarsamvinnustofnunar Íslands færð til utanríkisráðuneytisins.
Var markmiðið að einfalda skipulagið og hámarka árangurinn, með betri yfirsýn og samhæfingu.
Ljóst er að nokkuð vesen fylgir slíkri nafnabreytingu sem og kostnaður fyrir utan að nafnið er einstaklega óþjált í munni og verður seint talið fallegt, framför íslensks stofnanamáls, eða jákvæð þróun íslenskrar tungu.
Breyta þarf öllu bréfsefni, merkingum húsnæðis vefsíðu og fleira, en samkvæmt Sveini verður kostnaðurinn við breytinguna hverfandi.
Nafnið þarf að staðfesta með forsetaúrskurði og er Guðni Th. Jóhannesson því síðasta von andstæðinga stofnanamáls.
